«Үзілісте бапкер қатты жігерлендірді»: «Тобыл» қақпасына дубль жасаған ойыншы – «Оқжетпестің» жеңісі туралы

Көкшетаулық «Оқжетпестің» жартылай қорғаушысы Жансұлтан Мұхаметханов ASnews.kz сайтына берген сұхбатында ҚПЛ-дың 14-туры аясында қостанайлық «Тобылды» жеңгеннен кейінгі (2:1) әсерімен бөлісті.

Жеңістің құпиясы туралы

«Біз соңғы секундқа дейін берілмей ойнап, бапкерлік құрамның айтқанын нақты орындағаннан және командалық рухтың нәтижесінде жеңіске жеттік деп ойлаймын.

Ауа райына келетін болсақ – иә, аптап ыстықта ойнау оңай емес. Бірақ екі команда да мүлдем бірдей жағдайда ойнады. Қарсыласқа да бұл ыстық ауа райында ойнау біз сияқты қиын болды деп ойлаймын».

Киім ауыстыру бөлмесіндегі бапкердің сөзі туралы

«Бірінші таймнан кейін бапкерлеріміз үзілісте бізге дұрыс сөз тауып, рух-жігер берді. Киім ауыстыру бөлмесінде үлкен мотивация алдық, соның арқасында алаңға қуаттанып, жігерленіп шықтық. Бапкердің сол жігерлі сөздері ойынның соңғы секундына дейін әсер етті», – деді Мұхаметханов.

Жеңіс сыйлаған дубльден кейінгі сезімдер

«Әрине, бұл ерекше сезім. Жеңіс, ерекше эмоция, жанкүйерлердің ыстық қолдауы – барлығы керемет болды. Қазір біз үшін әр кездесу маңызды. Командалық ұйымшыл ойынның нәтижесінде бұл кездесуде екі гол соғу бұйырды. Өте қуаныштымын».

Әбинұр Нұрымбеттің «Ордабасыға» ауысуы туралы

«Иә, әрине, Әбинұрдың кеткені айтарлықтай сезіледі. Ол өте мықты әрі нағыз дарынды ойыншылардың бірі. Әбинұр командамыздың тактикасында, әсіресе алаң ортасында өте маңызды рөл атқарды. Дегенмен, кәсіби маман ретінде оған әріқарай өсу керек. Әбинұрға жаңа командасында тек сәттілік тілеймін», – деп түйіндеді футболшы.

Еске сала кетейік, «Оқжетпес» ойын барысында «Тобылдан» ұтылып жатып, Жансұлтан Мұхаметхановтың дублінің арқасында (48 және 65-минуттарда) 2:1 есебімен жеңісті жұлып алды. Қостанайлықтар 38-минуттан бастап Папа Алиун Ндиайе алаңнан қуылғаннан кейін азшылықта ойнады.

Осы жеңістен кейін «Оқжетпес» 27 ұпаймен ҚПЛ турнирлік кестесінің үшінші сатысына тұрақтады, ал «Тобыл» 12 ұпаймен 13-орында қалды. Көкшетаулықтар келесі кездесуін 27 маусым күні өз алаңында «Қайратқа» қарсы өткізеді.

Ағымдағы маусымда 20 жастағы тірек жартылай қорғаушысы Мұхаметханов «көкшетаулықтар» сапында барлық турнирлерде 16 матч өткізіп, үш гол соқты және екі нәтижелі пас берді.