«Бәсекелестер өздеріне қарасын»: Мартин – Әмір, легионерлер және «Ордабасының» сериясы жайлы

«Ордабасының» бас бапкері Андрей Мартин ASnews.kz сайтына берген сұхбатында «Тобылды» жеңгеннен кейінгі (3:0) өзекті сұрақтарға жауап берді.

19 жасар Әмірдің нәтижелілігі туралы

«Әмірмен де, өзге ойыншылармен де қарым-қатынасымыз өте жақсы. Біз оған өткен жылдан бері көмектесіп келеміз: негізгі командаға тарттық, өйткені оның әлеуетін көрдік. Бұл ретте асыққан жоқпыз, себебі әр қадамның өз уақыты бар. Жасұлан қазір дұрыс бағытта келеді.

Біз оған мақтау сөздер айтамыз, бірақ сонымен бірге тоқтамай еңбек етуге және үлкен жұмыс арқылы арманына ұмтылуға мәжбүрлейміз. Әмірді жарқын болашақ күтіп тұр деп үміттенемін», – деді Мартин.

Мартин жоқта міндетін атқарған Решитка жайлы

«Әр бапкердің өз рөлі бар. Мен штабтың барлық мүшелеріне ризамын және олардың өздерін жақсы көрсетіп жүргенін көріп отырмын. Қысқы өзгерістер өте дұрыс болды, өйткені үнемі күшейіп отыру маңызды. Марчел – менімен бірге ұзақ жолды өткерген бірінші көмекшім, ол бұл міндетті жақсы атқарып шықты».

Эвертон мен Наумецтің жағдайы қалай?

«Олар бабына қайта енуде. Жігіттердің динамикасы жаман емес – ақырындап қалыпқа келуде. Дегенмен, оларды жүйелі түрде негізгі құрамға қосу үшін тағы сәл уақыт қажет».

Нательдің екі айдан бері гол соқпағаны туралы

«Оған шабуылды аяқтаудан ләззат алып, ойыны жүріп кетуі үшін бір гол жетпей тұр. Тіпті жоғары деңгейдегі топ-футболшыларда да мұндай үзілістер болады, сондықтан біз Леоны қолдаймыз. Оның алаңдағы атқаратын жұмысы мен қосқан үлесін бағалаймыз, сондықтан тек шыдау керек».

Қазір шымкенттіктердің басты бәсекелесі кім?

«Турнирлік кестеге көп қарамаймын. Қазан айына дейін әлі матчтар көп, әрқайсысына мұқият дайындалу керек. Бәсекелестердің өз жолы бар, біздің өз жолымыз бар. «Ордабасы» – дәстүрі бар жақсы клуб, сондықтан бізде бәрі тамаша болғанын қалаймыз. Ал бәсекелестер өздеріне қарасын», – деп мәлімдеді ол.

ҚПЛ-дың 11-турында сырт алаңда өткен матчта «Ордабасы» Михай Кэпэцына мен Жасұлан Әмір соққан голдардың арқасында қостанайлық клубты тас-талқан етті. Қазақстандық шабуылшы осы маусымда нәтижелі әрекеттер санын 10-нан асырып тастады

Андрей Мартин «Алтайға» қарсы ойындағы (0:0) қылығы үшін алған дисквалификациясын өтеп бітті. Екі апта бойы 51 жастағы молдовалық маманның орнында ассистенті Марчел Решитка жұмыс істеді.

Шымкенттіктер ресми кездесулерде соңғы рет өткен жылдың қазан айында жеңілген болатын. Команда турнирлік кестеде бір матч артық өткізген «Қайратқа» ғана жол беріп, екінші орында келеді.