Магомед Адиев – Қазақстанға оралу нұсқасы жайлы: ол жақта өзімді бақытты сезіндім

Ресейлік «Крылья Советов» командасының бас бапкері Магомед Адиев ASnews.kz сайтына берген сұхбатында болашақта Қазақстанға оралу нұсқасын жоққа шығармайтынын айтты. Ол біздің елде Қарағандының «Шахтерін» және ұлттық құраманы жаттықтырып, жақсы нәтижелер тіркеді.

— Қазақстанға оралу мүмкін бе?

— Құдайдың сізді қайда апаратынын мүлдем білмейсіз. Сондықтан ешқашан «жоқ» деп айтпаймын. Сіз бүгін үш жылдық келісімшартқа қол қойдыңыз, бірақ бұл ештеңені білдірмейді. Келесі матчтарыңыз сіз үшін сөйлеп береді. Жеңіске жетіп жатсыз ба? Жұмысты жалғастыра бересіз. Жеңістер жоқ па? Сіздің орныңызды басқа бапкер басады. Сондықтан мына нәрсе болмайды деп айта алмайсыз. Неге оралмасқа?

Қайталап айтамын: Қазақстан халқы маған үлкен құрметпен және сүйіспеншілікпен қарады. Менің де оларға деген көзқарасым дәл сондай болды. Өзімді Қазақстанда бақытты сезіндім. Олар маған жылы қабақ танытты. Сондықтан ондағы көптеген адамдардың мені қолдайтынын білемін. Болашақта бәрі болуы мүмкін.

— БАҚ өткен жылы сіздің «Ордабасы» командасымен келіссөз жүргізгеніңізді хабарлады. Шымкентте жұмыс істеу мүмкіндігі шынымен де талқыланды ма?

– Нақты емес, бірақ біз әкіммен кездестік. Өтпелі кезең болды, басшылық ауысып жатты, сондықтан нақты мәмілеге келмедік. Қазір бұл туралы айтудың қажеті жоқ. Мен қазір «Крылья Советовта» жұмыс істеймін және осында болғаныма қуаныштымын.

– «Ақтөбені» жаттықтырмағаныңызға өкінесіз бе?

– Сол кезде мен оларға Грекиямен болатын матчқа дейін ұлттық құрамаға көңіл бөлгім келетінін айттым. Сол ойындардың қалай өтетінін күтуді ұсындым және кейінірек шешім қабылдайтынымды жеткіздім. Өкінішке орай, Грекиямен матч өте нашар өтті, дегенмен біз дайындыққа үлкен жауапкершілікпен қарадық. Ал Грекиядан кейін маған «Ахматтан» ұсыныс түскені белгілі болды, мен оны қабылдадым.

Адиев маусым айынан бері «Крылья Советовты» жаттықтыруда. Оның келісімшарты келесі жылдың ортасына дейін есептелген.