Мартин – «Торпедо» жанкүйерлерінің әрекеті жайлы: кім кедергі жасаса да, мықты болуымыз керек

«Ордабасының» бас бапкері Андрей Мартин BorodAbata.kz сайтына берген сұхбатында «Торпедоға» қарсы қарымта матч жайлы ойын білдіріп, грузин жанкүйерлерінің әрекетіне баға берді.

– Лука Имнадзе грузиялық клубқа қарсы ойында «Ордабасы» сапындағы алғашқы голын соқты. «Торпедомен» қарымта кездесуде одан тағы да гол күтуге бола ма?

– Қызық сұрақ, қалай жауап беретінімді де білмеймін. Мен бүкіл шабуыл шебіндегі ойыншылар өздерінің ең жақсы қасиеттерін көрсетеді деп күтемін. Лука ма, әлде басқа біреу ме, маңызды емес — ең бастысы команданың гол соғып, жеңіске жетуі. Тіпті Сағадаттың өзі екі гол соғып үлгерді: бір матчта бір ойыншы, екіншісінде – басқа бір ойыншы матчты алып шығады. Осылайша команда ұпай жинайды. Кімнің гол соғатыны соншалықты маңызды емес. Лука болсын, командаластарының бірі болсын. Ең бастысы – нәтиже.

– Командаңыз тұрған қонақүйдің маңында «Торпедо» жанкүйерлерінің шулаған сәтіне қатысты пікір білдіре аласыз ба?

– Бұл шудың қаншалықты әсер еткенін Сағадаттан сұрағаныңыз жөн болар (күлді). Жеке өзім туралы айтсам, бұл мені алаңдатпады. Иә, шынымен де, олардың келіп 10-15 минуттай шулағаны рас. Бірақ көп ұзамай кетіп қалды. Менің ойымша, біздің жігіттер бұған онша мән берген жоқ. Олардың барлығы кәсіби футболшылар, олар ойын жинақтап, фокусты қайда аудару керектігін біледі. Бізді кім мазаласа да, күштірек болуымыз керек.

17 шілде күні Шымкентте «Ордабасы» мен «Торпедо» арасындағы Конференция лигасының бірінші іріктеу кезеңіндегі қарымта матч өтеді. Алғашқы ойында грузиялық команданың мерейі үстем болды – 4:3.