Кенжебекпен бірге ойнаған футболшы «Ахматқа» ауысуды дұрыс деп санайды: үлкен клубқа кете алады

Беларусьтік қорғаушы Руслан Юденков ASnews.kz сайтына берген сұхбатында Қазақстан ұлттық құрамасының вингері Ғалымжан Кенжебектің «Ахмат» клубына ауысуына қатысты пікір білдірді.

Ғалымжанмен «Мақтаарал» сапында бірге ойнаған тәжірибелі футболшы Кенжебектің психологиялық тұрғыдан өскенін атап өтіп, Ресей Премьер-лигасына сәтті бейімделуі үшін маңызды факторларды атады.

«Годи – өте талантты жігіт. «Мақтааралда» оның қабілеті бірден көзге түсетін. Оны өзі де білгенімен, сол кезде басымдықтарды дұрыс қоя алмайтын еді. Қазір оған қарап, ойының өзгергенін байқайсың: өзіне көңіл бөле бастады, үйленді. Ал ұлттық құрамадағы соңғы ойындар оның көшбасшыға айналғанын және үлкен жарыстарға дайын екенін көрсетті», – деді Юденков.

Юденковтың пікірінше, қазіргі таңда Грозныйға көшу БАҚ-та айтылған Шотландия немесе Чехия клубтарындағы нұсқаларға қарағанда әлдеқайда тиімді.

«Ұсыныстарды мұқият саралау керек: біз оны нақты кім, қайда шақырғанын білмейміз. Мүмкін, «Ахматта» бас бапкер онымен жеке сөйлесіп, оған үлкен үміт артып отырған шығар. Бұған қоса, тіл жағынан қиналмайды, әрі командада Максим Самородов секілді серіктесінің болуы да маңызды. Менің ойымша, «Ахматта» оған барынша жайлы болады, бейімделу де жеңіл өтеді. Оның бәрі ойдағыдай болады деп сенемін, ал болашақта үлкен клубқа ауысуына қабілеті жетеді», – деп түйіндеді ол.

Ғалымжан Кенжебек «Ахмат» клубымен 4,5 жылдық келісімшартқа отырды. Бұған дейін 22 жастағы вингерге Грекия, Венгрия және Шотландия клубтары қызығушылық танытқаны хабарланған еді.

Грозныйда Кенжебек Қазақстан құрамасындағы серіктесі Максим Самородовпен бірге дор тебеді.

Руслан Юденков пен Ғалымжан Кенжебек 2022 жылғы маусымда «Мақтаарал» клубында өнер көрсеткен.

Бұған дейін Юденков «Атырау» клубындағы болашағы жайлы пікір білдірген болатын.