Қашкен – ұлттық құрамадағы футболшылар жайлы: ешқайсысы бізден жаман өмір сүрмейді

Өткен маусымды «Ұлытау» сапында бастап, кейіннен «Жетісуға» ауысқан 25 жастағы қазақстандық қорғаушы Дінмұхаммед Қашкен ASnews.kz сайтына берген сұхбатында ұлттық құрамаға шақыртылуына байланысты хейттің туындауына себеп болған факторды атады.

– Хейт Бейбіт Әлібековпен болған шығарылымнан кейін көбейді деп ойламайсың ба? Жұрт сенің кәсіби футболшы екеніңді білмеген де шығар, ал сен дәл сол кезде ұлттық құрамаға шақыртылдың.

– Иә, бұл да әсер етті деп ойлаймын. Ол менің жеке өмірімді, үйімді түсірді. Жағдаймыздың жақсы екенін жұрт көрді. Менің жұбайым блогер болғандықтан, оның оқырмандары менің футболшы екенімді білмеген. Чемпионаттың ойындарын ешкім көрмейді. Оның үстіне, «Жетісуды» кім бақылайды? Тек клуб фанаттары ғана. Сондықтан бұл шығарылым әсер етті деп ойлаймын. Бірақ ұлттық құрамадағы қай футболшыны алсаңыз да, бізден жаман өмір сүрмейді. 

– Бұл шығарылым не үшін қажет болды? Бейбіт сені көндіру үшін көп тырысты ма?

– Иә, Бейбіт біраз тырысты. Біз басында оған келісім бердік. Менің ойымша, бұл футбол мен жеке өміріме кедергі келтірмейді. Әлем футболында да ойыншылардың үйлерін түсіріп жатады. Мен Instagram парақшамды блогерлер сияқты жүргізіп, футболды да ойнап үлгеремін. Бір-біріне кедергі келтірмейді деп ойлаймын.

– Бұл тұста екі нәрсені атап өтуге болады: біріншіден футболшылар ұлттық құрамада бірдеңе жеңіп алу үшін ойнайды, екіншіден, бұл жетістіктерін жарияламайтындар көп. 

– Өз атыңды қалыптастырған дұрыс қой. Instagram-да әжептеуір ақша бар. Блогерлер сол арқылы табыс табуда. Мысал ретінде Хави Симонсты айтсақ болады. Ол да басында осындай контент жасаған кезде хейт көп болды. Айта берсек, мұндай ойыншылар көп. Футболда өз атыңды қалыптастыру үшін жетістікке жету керек. Оған да жетерміз. 

– Әкең Әлібековпен болған шығарылым сенің мансабыңа кері әсерін тигізгенін, соның әсерінен хейттің көбейгенін айтты. Ол кісі тіпті түсірілімнің болатынын білмеген екен.

– Бейбіттің түсірген дүниесі мансабыма қалай кері әсерін тигізеді? Менің жұбайым блогер болғандықтан, бәрібір пәтерімізді түсіріп, блог жасайтын еді. Бір Алладан басқа ешкім мансабыма зиянын тигізе алмайды.

Қазан айында Талғат Байсуфинов Қашкенді ұлттық құрамаға шақырып, оның көрсеткіштері басқа кандидаттарға қарағанда жақсы екенін айтқан еді. Бірақ Лихтенштейн және Солтүстік Македониямен болған матчтарға қатыспады.